Archive for September 22nd, 2016

Thursday, 22 September 2016

Cokkils by Sydney Goodsir Smith

Doun through the sea
Continuallie
A rain o’ cokkils, shells
Rains doun
Frae the ceaseless on-ding
O’ the reefs abune
Continuallie.

Slawlie through millennia
Biggan on the ocean bed
Their ain subaqueous Himalaya
Wi a fine white rain o’ shells
Faa’an continuallie
Wi nae devall.

Sae, in my heid as birdsang
Faas throu simmer treen
Is the thocht o’ my luve
Like the continual rain
O’ cokkils throu the middle seas
Wi nae devall –
The thocht o’ my true-luve
Continuallie.

From: http://www.scottishpoetrylibrary.org.uk/poetry/poems/cokkils

Date: 1953

By: Sydney Goodsir Smith (1915-1975)